काठमाडौं– नेपाल कम्युनिस्ट पार्टीका महासचिव नेत्रविक्रम चन्दले विप्लवले बजेटमा धेरै विवादास्पद कुराहरु रहेको बताएका छन् ।

शनिबार जनश्रम कृषि सहकारी संस्था लिमिटेडले गरेको कृषिमा लगानी र एकीकृत स्वामित्व प्रणाली विषयक अन्तर संवादमा बोल्दै उनले सरकारमै बसिरहेका पार्टीहरूले नै बजेटमा असन्तुष्टि जनाएको बताए ।

उनले भने, ‘अर्थतन्त्रको कुरा गर्ने बित्तिकै आर्थिक दृष्टिकोण, आर्थिक निर्माण, पुँजी निर्माणको कुरा गर्ने बित्तिकै दुई वटा कुरा हो । एउटा, राज्यको कुरा हो । अर्को, संस्था र नागरिकको कुरा हो । राज्यले गरिराखेको छ तर अलमलिएको देख्छौँ हामी । बजेट आयो । बजेटको बारेमा यति धेरै विवादास्पद कुराहरु छन् अहिले । राम्रा पनि छन् ।’

उनले सरकारमै बसिरहेका पार्टीहरूका निर्णायक प्रभाव पार्ने खालका नेताहरूले पनि बजेटको आलोचना गरिरहेको बताए ।

१२ खर्बको राजस्व र १८ खर्बको बजेटलाई नेपाली जनताको जीवनसँग जोडेर परिचालन गर्ने खालको नभएको उनको दाबी छ ।

उनले अगाडि भने, ‘सरकारमै बसेका नेताहरू, मन्त्री भएकै मान्छेहरूले यो बजेट काम छैन भन्न थालेपछि अब नागरिकले के आशा राख्ने आर्थिक क्षेत्रमा सरकारको नेतृत्व गरेका र प्रतिपक्ष सबैका ट्रेन्ड हेर्नुभयो भने आर्थिक परिचालन गरेर १२ खर्बको राजस्व र १८ खर्बको बजेटलाई नेपाली जनताको जीवनसँग जोडेर परिचालन गर्नेखालको देखिँदैन ।’