सुनसरी – धरानको तीनकुने प्रवेशद्धारस्थित प्रहरीको चेकजाँच टोलीले ठूलो परिमाणमा बिल बिनाको औषधी बरामद गरेको छ ।

बरामद औषधीसहित प्रहरीले बिराटनगर महानगरपालिका – १२ बस्ने २७ वर्षीय राकेश कुमार यादवलाई पक्राउ गरेको हो । यादवलाई सोमबार बेलुका सात बजे पक्राउ गरे पनि आज दिउँसोमात्र सार्वजनिक गरेको हो ।

यादवको साथबाट प्रहरीले १७ हजार ५०० ट्याब्लेट स्पाज्मो डाइसाइक्लोमाइन औषधी बरामद गरेको सुनसरी जिल्ला प्रहरी कार्यालयले जनाएको छ । यो औषधी विषेशगरी पेट र छातीमा अति गम्भीर दुखाई हुँदा चिकित्सकको अनुमतिबाट मात्र बिरामीले मेडिकल हलबाट किनेर खान पाउँछन्‌ ।

भद्रपुरबाट धरान आउँदै गरेको को १ ख ७४५१ यात्रुवाहक वस चेकजाँच गर्दा जेब्रा झोलामा लुकाएर ल्याएको स्पाज्मो प्रोक्सिभन औषधी बरामद गरेको प्रहरीले जनाएको छ । बिनाबिलको औषधीसहित पक्राउ परेका राकेशकुमार यादवलाई इलाका प्रहरी कार्यालय धरानको हिरासतमा राखेर थप अनुसन्धान भइरहेको छ ।

प्रतिबन्धित लागुऔषध ओसारपसारमा प्रहरीले कडाइ गर्न थालेपछि लागुपदार्थका दुर्व्यसन र कारोबारी गिरोहले केही वर्षयता औषधी पसलमा सहजै प्राप्त गर्न सकिने दुखाई कम गराउने र मानसिक रोग लाग्दा निदानका लागि सेवन गर्ने औषधीहरू प्रयोग गर्न थालेका छन् ।