काठमाडौं – चालु आर्थिक वर्षको दोस्रो महिना भदौमा रेमिट्यान्स (विप्रेषण आप्रवाह) १५.५ प्रतिशतले बढ्दा नेपालबाट विदेशतर्फ बस्तु तथा सेवा निर्यात ५.१ प्रतिशतले घटेको छ ।

नेपाल राष्ट्र बैंकले सार्वजनिक गरेको ‘देशको वर्तमान आर्थिक तथा वित्तीय स्थिति’ प्रतिवेदनमा रेमिट्यान्स र निर्यातबीच विपरीत अवस्था देखिएको हो ।

दशैँ र तिहार लगायत उपभोग बढी हुने चाडपर्वको छेकोमा उपभोग्य बस्तु तथा सेवा खरिद गर्न विदेशबाट साविकभन्दा बढी रेमिट्यान्स पठाइएको र विदेशतर्फ निर्यात हुने गरेको सामानकै केही हिस्सा समेत स्वदेशमै खपत भएको हो । भदौमा आयात १.१ प्रतिशतले बढेको र निर्यात ५.१ प्रतिशतले घटेको हो ।

केन्द्रीय बैंकका अनुसार वार्षिक बिन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ३.८५ प्रतिशत रहेको छ । अघिल्लो वर्षको भदौमा यस्तो मुद्रास्फीति अर्थात् महँगी ८.१९ प्रतिशत थियो ।

शोधनान्तर स्थिति एक खर्ब एक अर्ब ७७ करोड रुपैयाँले बचतमा रहेको केन्द्रीय बैंकले जानकारी दिएको छ । कुल विदेशी विनिमय सञ्चिति २१ खर्ब ५२ अर्ब ५३ करोड रुपैयाँ र अमेरिकी डलरमा १६ अर्ब चार करोड रहेको छ ।

भदौ मसान्तसम्म नेपाल सरकारको खर्च एक खर्ब ३७ अर्ब ५५ करोड र राजस्व परिचालन एक खर्ब ६६ अर्ब ३९ करोड रुपैयाँ भएको छ

विस्तृत मुद्राप्रदाय ०.४ प्रतिशतले बढेको छ । वार्षिक बिन्दुगत आधारमा यस्तो मुद्राप्रदाय १३.९ प्रतिशतले बढेको हो । बैंक तथा वित्तीय संस्थाको निक्षेप संकलन ०.५ प्रतिशतले बढेको छ र निजी क्षेत्रमा प्रवाहित कर्जा १.४ प्रतिशतले बढेको छ ।

वार्षिक बिन्दुगत आधारमा निक्षेपको वृद्धिदर १३.८ प्रतिशत र निजी क्षेत्रमा प्रवाहित कर्जाको वृद्धिदर ६.६ प्रतिशत रहेको केन्द्रीय बैंकले जानकारी दिएको छ ।