काठमाडौं – पाकिस्तानमा पोलियो रोगका बिरामीको सङ्ख्या बढ्दै गएको छ । त्यहाँ हालसम्म ४८ जनामा पोलियो रागेको संक्रमण देखिएको छ ।

पाकिस्तानबाट प्रकाशित हुने डन अखबारका अनुसार हालैमात्र खैबर पख्तुनख्वा र सिन्ध प्रान्तमा एक एक जनामा यो रोग देखा परेको छ । खैबर पख्तुनख्वा प्रान्तको डेरा इस्माइल खाँ जिल्लामा एक जना र सिन्धको घोटकी जिल्लामा अर्का एक जनामा यो रोग देखा परेको छ ।

डनका अनुसार यस वर्ष पहिलो पटक घोटकी जिल्लामा पोलियोको रोगी फेला परेका हुन् । उता डेरा इस्माइल खाँ जिल्लामा भने यो वर्ष तीन जनामा पोलियो देखा परिसकेको छ ।

हालैमात्र उक्त जिल्लामा २८ महिने बालकमा यो रोग देखा परेको डनले जनाएको छ । यस वर्ष पाकिस्तानको बलोचिस्तानमा २३ जनामा, सिन्धमा १३, खैबर पख्तुनख्वामा १० र पञ्जाब र इस्लामावादमा समान एक जनामा पोलियो रोग देखा परेको छ ।