काठमाडौं – सामूहिक बलात्कार गरेको आरोपमा बंगलादेशमा दुई जना चिनियाँ नागरिक पक्राउ परेका छन् । गाजिपुर क्षेत्रमा एक जना महिलामाथि सामूहिक बलात्कार गरेको आरोपमा उनीहरुलाई पक्राउ गरिएको ढाका ट्रिब्युनले जनाएको छ ।

पक्राउ पर्नेमा अब्दुर रहमान बताउने २८ वर्षीय वाङ झाओ याङ र ४५ वर्षीय वाङ झाओफेङ रहेका छन् । गाजिपुरको कशिमपुरमा अर्का चिनियाँ नागरिक ४१ वर्षीय याङ जिङसँगै उनीहरु भाडामा बस्दै आएका थिए ।

सो क्षेत्रमा बस्दै गर्दा वाङ झाओ याङले एक जना सम्बन्धविच्छेद भएकी महिलासँग विवाह गरेका थिए । विवाह गरेको तीन महिनापछि उनले साथीसँग मिलेर आफ्नै श्रीमतीमाथि बलात्कार गरेको जनाइएको छ ।

बंगलादेशबाट भागेर चीन जान लागेका बेला उनीहरुलाई राजधानी ढाकास्थित हजरत शाहजलाल अन्तर्राष्ट्रिय विमानस्थलबाट नियन्त्रणमा लिइएको हो । उनीहरुलाई पक्राउ गरी गाजिपुरमा रहेको महानगरीय अदालतमा उपस्थित गराइएको छ ।