काठमाडौं- पूर्वमिस नेपाल नम्रता श्रेष्ठले फिल्म ‘रंगी’ खेल्ने भएकी छन् । मिस नेपालको उपाधि जितेको ४ वर्षपछि उनले फिल्ममा डेब्यू गर्न लागेकी हुन् ।

निर्माण पक्षसँग उनको कागजी सम्झौता भइसकेको छ । आफूलाई प्रस्ताव गरिएको भूमिका मन परेकालो फिल्म खेल्ने मनस्थिति बनाएको उनले बताइन् ।

‘स्क्रिप्ट पढ्दा मैले स्कुल पढाउँदाको समय सम्झिएँ । यसमा मेरो क्यारेक्टर पनि रमाइलो खालको छ । बच्चाको लागि एउटा आमा जस्तो भूमिका गर्नु पर्ने भएकाले पनि काम गर्न मन लाग्यो’, नम्रता भन्छिन् ।

अनुबन्ध भएसँगै नम्रताले पहिला एक वेभ सिरिजमा प्रस्ताव आए पनि विवादास्पद भूमिका महसुस भएर काम नगरेको खुलाइन् । भन्छिन्, ‘म अलिक सोझी छु । तर वेब सिरिजको क्यारेक्टर ग्ल्यामर भएकाले विवाद आउँछ भनेर काम गरिनँ ।’

नम्रता मिस वर्ल्ड नेपाल २०२० की विजेता हुन् । त्यसअघि उनी किन्डरगार्डेन शिक्षिका थिइन् ।

केही पूर्वमिस नेपालहरु अहिले पनि फिल्ममा सक्रिय छन् । अब फिल्म क्षेत्रले अर्को मिस नेपाललाई पनि पाउने पक्का भएको हो ।

यसअघि निर्माण पक्षले फिल्मको टाइटल पोस्टर सार्वजनिक गरेको थियो । उक्त पोस्टरमा साइकलमा बसिरहेकी एक बालिका र एक पुरुष प्रस्तुत गरिएको छ । पृष्ठभूमिमा सूर्यास्त देख्न सकिन्छ ।

टाइटल पोस्टरबाट फिल्म सोसल ड्रामा जनरामा बन्ने अनुमान गर्न सकिन्छ ।

‘रंगी’ सलोन सलिना फिल्मस् प्रालिको ब्यानरमा बन्न लागेको हो । यस फिल्मबाटै सुरेश न्यौपानले फिल्म निर्देशनमा डेब्यू गर्न लागेका हुन् । उनीसँग ‘छक्का पन्जा’, ‘ए मेरो हजुर २’, ‘यात्रा’, ‘म यस्तो गीत गाउँछु २’, ‘कृ’लगायतका फिल्ममा मुख्य सहायक निर्देशन गरेको अनुभव छ ।

सुमन गजमेरको लेखन रहने यस फिल्मको निर्माता सक्षम सुवेदी हुन् ।