काठमाडौं– एएफसी च्यालेन्ज लिगको प्लेअफमा आज नेपाली लिग च्याम्पियन चर्च ब्वाइज युनाइटेड र भुटानी टोली पारो एफसीबीच प्रतिस्पर्धा हुँदैछ ।

खेल साँझ ६ बजे त्रिपुरेश्वरस्थित दशरथ रंगशालामा सुरु हुनेछ । चर्च ब्वाइज अनन्त तामाङ र पारो एफसी किन्ले वाङचुकको कप्तानीमा मैदानमा उत्रँदै छन् ।

तीनपटक विश्वकप खेलिसकेका जापानका केइसुकी होन्डासहित ११ विदेशी खेलाडीको साथ पाएको पारो एफसी चर्च ब्वाइजका लागि चुनौती बन्न सक्नेछ । यद्यपि, चर्च ब्वाइजमा पनि नेपाली राष्ट्रिय टोलीका अधिकांश सदस्य छन् । त्यसैले, चर्च ब्वाइजले भुटानीसँग खेल्दा नेपाली राष्ट्रिय टोलीको झल्को दिनेछ ।

पारोले अघिल्लो वर्ष दशरथ रंगशालामा नै एएफसी कप पहिलो चरणमा मच्छिन्द्र क्लबसँग ३–२ गोलको हार बेहोरेको थियो ।

सिंगल लेग नकआउट फर्म्याटमा हुने खेलको विजेता प्रतियोगिताको समूह चरणका लागि छनोट हुनेछ। प्रतियोगितामा छनोट हुने टोलीले न्युनतम एक लाख अमेरिकी डलर प्राप्त गर्नेछ ।

समूह चरणका खेलहरू अक्टोबर २६ र नोभेम्बर २ मा ‘होम एन्ड अवे’ का आधारमा हुनेछन्।

करिव एक महिनादेखि चर्च ब्वाइजले यो प्रतियोगिताको तयारी गरेको छ । राष्ट्रिय टोलीबाट खेलेका खेलाडीबीच तालमेल मिलेको र यसले खेलमा प्रभाव ल्याउने चर्च ब्वाइजका प्रशिक्षक बालगोपाल महर्जनको विश्वास छ ।

खेलाडीले आफ्नो क्षमता र रणनीतिअनुरूप खेल्नसके घरेलु समर्थकलाई सुखद् नतिजा दिन सक्षम हुने प्रशिक्षक महर्जनको विश्वास छ ।

पारोले अहिले भूटानमा लिग खेलिरहेको छ । लिगमा पारो शीर्ष स्थानमा छ । चर्च ब्वाइजसँगको खेलका लागि पारोले जापानका पाँच खेलाडी, युरोप र केही अफ्रिकन खेलाडीलाई भित्राउँदै थप बलियो बनाएको छ ।