काठमाडौं – बुकायाको साकाले गरेको दुई गोलमा मोनाकोलाई पराजित गर्दै आर्सनलले सिधै च्याम्पियन्स लिग फुटबलको दोस्रो चरणमा प्रवेश गर्ने सम्भावनालाई बलियो बनाएको छ।

बुधबार घरेलु मैदानमा भएको खेलमा आर्सनलले ३-० को सफलता पाएको हो। ६ खेलको समाप्तिमा आर्सनल १३ अङ्कसहित तेस्रो स्थानमा छ।

पहिलो हाफमा नै आक्रामक रहेको खेलमा ब्राजिलियन खेलाडी गाब्रियल जेससको पासमा साकाले गोल गर्दै ३४ औँ मिनेटमा टोलीलाई पहिलो अग्रता दिलाए। ७८ औँ मिनेटमा विपक्षी खेलाडीले गरेको गल्तीको फाइदा उठाउँदै साकाले अर्को गोल गरे। ८८ औँ मिनेटमा वैकल्पिक खेलाडीको रूपमा मैदानमा प्रवेश गरेका काइ हार्भेटजले आर्सनलका लागि अर्को गोल गरे।

स्टुवार्म ग्राजलाई ३–२ ले हराउँदै लीली पनि सिधै दोस्रो चरण प्रवेशको होडमा बलियो बनेको छ। लीलीलाई जित दिलाउने क्रममा वैकल्पिक खेलाडी हाकन हार्डलसनले निर्णायक गोल गरेका थिए। यसअघि लिलीका लागि ओसामे साराउरी र मिचेल बाकरले गोल गरेका थिए। यसैगरी स्टुवार्मका लागि ओटार किटेस्चभिइल र माइक बिरेथले गोल गरेका थिए।

लिभरपुलको १८ तथा बार्सिलोनाको १५ अङ्क रहेको तालिकामा ६ टोलीको १३ अङ्क छ। यी ६ टोलीमा लीली पनि एक हो।