काठमाडौं – नेपाल राष्ट्र बैंकले चालु आर्थिक वर्षको साउनदेखि कात्तिक मसान्तसम्मको ‘देशको आर्थिक तथा वित्तीय स्थिति’ प्रतिवेदन सार्वजनिक गरेको छ ।

बिहीबार अपराह्न सार्वजनिक प्रतिवेदनमा उल्लेख भएअनुसार विप्रेषण आप्रवाह नेपाली रुपैयाँमा ९.१ प्रतिशतले बढेको छ । शोधनान्तर स्थिति दुई खर्ब पाँच अर्ब ८३ करोड रुपैयाँले बचतमा छ ।

नेपालसँग अहिले कुल विदेशी विनिमय सञ्चिति अमेरिकी डलरमा १६ अर्ब ७० करोड रहेको केन्द्रीय बैंकले जनाएको छ । नेपाल सरकारको खर्च चार खर्ब १५ अर्ब २ करोड र राजस्व परिचालन तीन खर्ब २३ अर्ब २४ करोड रुपैयाँ छ ।

बैंकका अनुसार; वार्षिक बिन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ५.६० प्रतिशत रहेको छ । आयात ०.२ प्रतिशतले र निर्यात ४.२ प्रतिशतले बढेको छ ।

कात्तिक मसान्तसम्म विस्तृत मुद्राप्रदाय ३.० प्रतिशतले बढेको छ । वार्षिक बिन्दुगत आधारमा यस्तो मुद्राप्रदाय १२.१ प्रतिशतले बढेको
राष्ट्र बैंकले जानकारी दिएको छ ।

बैंक तथा वित्तीय संस्थाको निक्षेप संकलन २.३ प्रतिशतले र निजी क्षेत्रमा प्रवाहित कर्जा २.५ प्रतिशतले बढेको छ । वार्षिक बिन्दुगत आधारमा निक्षेपको वृद्धिदर १२.६ प्रतिशत र निजी क्षेत्रमा प्रवाहित कर्जाको वृद्धिदर ६.२ प्रतिशत छ ।