काठमाडौं– कालिका लघुवित्त वित्तीय संस्था लिमिटेडले शेयरधनीलाई गत आर्थिक वर्ष २०८०–८१ को वितरणयोग्य नाफाबाट १० प्रतिशत बोनस दिने भएको छ । कम्पनीको मङ्गलवार बसेको सञ्चालक समितिको बैठकले बोनस दिने घोषणा गरेको हो ।

कम्पनीका सचिव फणीन्द्र पाण्डेका अनुसार लघुवित्तले उक्त पुँजीको ३ करोड ५३ लाख ७० हजार ५६५ रुपैयाँ बराबरको ९.५० प्रतिशत बोनस शेयर र कर प्रयोजनका लागि १८ लाख ६१ हजार ६०८ रुपैयाँ बराबरको ०.५० प्रतिशत नगद लाभांश दिने भएको छ ।

उक्त बोनस नेपाल राष्ट्र बैंकले स्वीकृति दिए पनि र आगामी साधारणसभाले पास गरेपछि शेयरधनीलाई वितरण गरिने कम्पनीले जनाएको छ ।

हाल कम्पनीको चुक्ता पुँजी ३७ करोड २३ लाख २१ हजार ७३९ रुपैयाँ बराबरको रहेको छ । बोनस घोषणा गर्दा कम्पनीले बुक क्लोजको मिति भने तय गरेको छैन ।