काठमाडौं- वर्षा राउत अहिलको चल्तीको नायिका हुन् । उनले दोस्रो फिल्म छक्का पञ्जा नै हिट भयो । उनको तेस्रो फिल्म ‘जात्रा’ पनि दर्शकले रुचाए । उनी हिट श्रृङ्खला जात्राको रुचाइएकी कलाकार हुन् ।

हिट फिल्महरूमा वर्षा आमाको भूमिकामा देखिएकी हुन्छिन् । छक्का पञ्जा होस् वा जात्रा श्रृङ्खला उनी आमाको भूमिकामै थिइन् । उनले आफ्नो वास्तविक उमेरभन्दा बढीको भूमिका निर्वाह गरेका फिल्म हिट छन् ।

अग्लो, गोरो, मसल भएको हिरोसँग रोमान्स गर्ने, डाडाँ, झरना, फूलबारीमा साडी उडाउँदै नाच्ने वा कथित हिरोइनहरूले निर्वाह गर्ने भूमिकामा उनी देखिएकी छैनन् ।

अर्थात् उनको ‘ग्ल्याम्मर’ फिल्ममा देख्न पाइँदैन । सामाजिक सञ्जालका तस्बिरमा र विभिन्न कार्यक्रममा भने उनलाई ग्ल्याम्मर लुक्समा देख्न सकिन्छ । केही तस्बिर भाइरल पनि छन् ।

अर्कोतर्फ अभिनय करिअरकै सुरुवातमा नायिकाहरू हत्तपत्त आमाको भूमिकामा देखिन चाहँदैनन् । यसका उदाहरण धेरै छन् । ‘आमाको भूमिका निर्वाह गर्दा सहायक भूमिकामा धकेलिन्छु कि’ भन्ने भय अहिले पनि केही नायिकामा यथावत छ ।

तर वर्षा यसमा अपवाद छिन् । सुरुवाती फिल्मबाटै उनले आमाको भूमिका निर्वाह गरिरहेकी छन् । यसअर्थमा उनले जोखिम लिएकी हुन् भन्दा फरक पर्दैन ।

यो पनि…

‘तेल भिसा’का निर्देशकको प्रष्टीकरण : फिल्मको संवाद भाइरल टिकटकसँग मिल्नु संयोग

फिल्म ‘तेल भिसा’को निर्माण पक्षले हात्तिसारमा सोमबार गरेको पत्रकार सम्मलेनमा यसबारे वर्षाले बोलिन् । फिल्ममा उनी गर्भवती र आमाको भूमिकामा रहेकाले पनि यसको प्रसंग उठ्यो ।

आफूलाई आमाको भूमिकामा प्रस्ताव आउनुको कारणबारे वर्षाको बुझाइ छ, ‘म दोस्रो र तेस्रो फिल्ममा आमाको भूमिकामा थिएँ । दुवैमा दर्शकले मेरो भूमिका रुचाउनुभयो । त्यसकारण मलाई फिल्मको अफर पनि त्यही हिसाबले आउन थाल्यो ।’

त्यसपछिका दिनमा एक समय ‘होइन मलाई किन यस्तो भूमिकामा प्रस्ताव आउँछ ?’ भन्ने प्रश्न मनमा खेलेको समेत उनले खुलाइन् । तर अहिलेको भने उनलाई त्यस्तो सोच आउँदैन रे !

भन्छिन्, ‘अहिले मलाई जे भूमिका गरेँ राम्रै भएछ जस्तो लाग्छ । किनभने म यहाँ कलाकार बन्नका लागि आएको हो, होरोइन होइन ।’

फिल्ममा अभिनय सशक्त भूमिकामै प्राथमिकता राख्नुपर्छ भन्ने महसुस भएको वर्षा बताउँछिन् । थप्छिन्, ‘मलाई अभिनयमा आउँदा नै बारीमा गएर सल उडाउनुपर्छ भन्ने कहिल्यै लागेन । त्यसप्रति मेरो मोह थिएन ।’

यद्यपि राम्रो कथा र सशक्त भूमिका भएको अवस्थामा ‘ग्ल्याम्मर लुक्स’मा देखिन पनि पछि नपर्ने उनी बताउँछिन् ।