काठमाडौं- नायक आर्यन सिग्देल फिल्म ‘होस्टल ३’को मुख्य भूमिकाका लागि अनुबन्ध भएका छन् । निर्माण पक्ष र उनीबीच बुधबार लिखित सम्झौता भएको छ ।

निर्देशक सशान कँडेलका अनुसार आर्यनले फिल्ममा वार्डेनको भूमिका निर्वाह गर्ने छन् । अघिल्ला श्रृंखलाभन्दा यसमा वार्डेनको भूमिका मजबुत रहेको उनको भनाइ छ ।

आर्यनको भूमिकाबारे कँडेल भन्छन्, ‘उहाँको भूमिका चलचित्रको मेरुदण्ड हो। यसअघि पनि होस्टेल श्रृंखलामा वार्डेनको भूमिका चर्चित थियो । तर यस पटक अझ बलियो छ ।’

यस फिल्ममा नायिका परीक्षा लिम्बू पनि जोडिएकी छन् । कँडेलका अनुसार फिल्ममा उनको विशेष भूमिका छ ।

यसअघि नै फिल्ममा पारस बम ‘कुल ब्वाई’, रिहान गिरी, आशिष घिमिरे, पदम तामाङ, सिम्रन पन्त, हेना नगरकोटीलगायतका कलाकारहरू अनुबन्ध भइसकेका छन् ।

यही साताभित्रै छायांकनमा निस्किने योजनामा निर्माण पक्ष छ । प्रदर्शन मिति फागुन १६ लाई तोकिएको छ।

होस्टल ३ को कथा निर्देशक स्वयमको हो भने स्क्रिप्ट माधव शर्माले लेखेका हुन् ।

होस्टल ३ सम्मान इन्टरटेन्मेन्टले आरोन कन फिल्मस्सँगको सहकार्यमा निर्माण गर्न लागेको हो । यस फिल्मका कार्यकारी निर्माता शंकर कोइराला, निर्माता कर्ण कार्की र गोविन्द अधिकारी हुन्।