काठमाडौं– आज पौष कृष्ण औँसी । दक्षिणायनको अन्तिम औँसीमा आज पितृलाई श्रद्धापूर्वक तर्पण, सिदादान र पिण्डदान गरी श्राद्ध गरिँदैछ ।

सौरमासअनुसार माघेसङ्क्रान्तिदेखि र चान्द्रमासअनुसार माघ कृष्ण प्रतिपदादेखि उत्तरायण सुरु हुन्छ । उत्तरायण सुरु हुनुअघिको औँसी अर्थात् पौष कृष्ण औँसीमा पितृलाई विधिपूर्वक आह्वान गरी श्राद्ध गर्ने परम्परा छ ।

पौषकृष्ण औँसीका अवसरमा नुवाकोट र रसुवाको सङ्गमस्थल वेत्रावतीको उत्तरगया धाम र काठमाडौँको  गोकर्णेश्वर महादेव मन्दिर क्षेत्रमा भक्तजन दिवङ्गत पितृका नाममा तर्पण, सिदादान र पिण्डदानका गरेका छन् ।

आज नुवाकोट र रसुवाको सङ्गमस्थल वेत्रावतीको उत्तरगया धाम र काठमाडौँको उत्तरपूर्वी भेगस्थित उत्तरगयाका रुपमा प्रसिद्ध गोकर्णेश्वर महादेव मन्दिर क्षेत्रमा बिहानदेखि भीड लागिरहेकाे छ ।