काठमाडौं ( अख्तियार दुरुपयोग अनुसन्धान आयोगले सशस्त्र प्रहरी बल, नेपाल नं. २९ गण हेडक्वार्टर ज्वालामाई दाङबाट राजीनामा दिएका सशस्त्र प्रहरी निरीक्षक (सई) छविलाल कुँवरविरुद्ध भ्रष्टाचार मुद्दा दर्ता गरेको छ । आयोगले विशेष अदालतमा मङ्गलबार कुँवरविरुद्ध मुद्दा (आरोपपत्र) दायर गरेको हो

यसअघि नै सेवाबाट राजीनामा दिएका कुँवरको शैक्षिक योग्यताको प्रमाणपत्र छानबिन गर्न आयोगमा उजुरी परेको थियो । माध्यमिक शिक्षा परिषद, उत्तर प्रदेश (बोर्ड अफ हाइस्कूल एण्ड इण्टरमिडियट एजुकेशन, यूपी) अन्तर्गत हाई स्कूल तहको परीक्षा उत्तीर्ण गरेको प्रमाणपत्र पेश गरी उनी सशस्त्र प्रहरीमा भर्ना भएका थिए ।

उजुरीमाथि अनुसन्धान हुँदा कुँवरले झुट्टा शैक्षिक प्रमाणपत्र पेश गरी राष्ट्रसेवकको पदमा प्रवेश गरी बढुवा भई ओहदा एवम्‌ लाभसमेत प्राप्त गरेको खुलेको आयोगले जानकारी दिएको छ ।

कुँवरलाई आयोगले साविक भ्रष्टाचार निवारण ऐन, २०१७ को दफा १२, दफा २९(२) तथा भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुर लगाएको छ । उनीविरुद्ध ऐनका उल्लेखित प्रावधान बमोजिम सजाय मागदाबी भएको छ ।