कास्की- रुपा गाउँपालिकाले स्वास्थ्य संस्थामा परीक्षणमा आउने गर्भवतीलाई प्रत्येक पटक एक क्रेट कुखुराको अण्डा वितरण कार्यक्रम सुरुआत गरेको छ ।

‘मापदण्डअनुसार गर्भजाँच गरौँ, आमा र नवजात शिशुको स्वास्थ्य संरक्षण गरौँ’ भन्ने अभियानका साथ महिलामा पोषणको कमी हुन नदिन सो कार्यक्रम थालिएको गाउँपालिकाका अध्यक्ष नवराज ओझाले बताए ।

उनले भने, “गर्भवतीले आठपटक स्वास्थ्य परीक्षण गराउनुपर्छ । गाउँपालिकाका स्वास्थ्य संस्थामा परीक्षण गराउन आउने गर्भवतीलाई प्रत्येकपटक परीक्षण गर्न आउँदा एक क्रेट अण्डा दिने कामको सुरु गरेका छौँ । यसबाट मातृ शिशु मृत्युदर घटाउन र पोषणको सुनिश्चितताका लागि सहयोग पुग्नेछ ।”

अध्यक्ष ओझाले महिलामा पोषणको काम पनि नहुने र मापदण्ड अनुसारको नियमित परीक्षण कार्यक्रमसमेत प्रभावकारी हुने भएकाले अण्डा वितरण अभियान नै थालिएको बताए । “स्वास्थ्य संस्थामा जान हिचकिचाउने गरेको अझै देखिन्छ । नियमित स्वास्थ्य संस्थामा गएर गर्भ परीक्षण गराउने बानी बसाल्न अण्डा उपहार कार्यक्रम ल्याएका हौँ, अध्यक्ष ओझाले भने ।

कुखुराको अण्डा नखाने ब्राह्मण समुदायका गर्भवती वा शाकाहारीको हकमा एक क्रेट अन्डाको मूल्य बराबरको रकम दिइने पालिका अध्यक्ष ओझाले बताए ।

एक क्रेटमा ३० वडा अण्डा हुन्छ, जसको मूल्य करिब ५ सय रुपैयाँ पर्छ ।

गाउँपालिकामा एक वर्षमा २३१ जना सुत्केरी हुने गरेको गाउँपालिकाको तथ्याङ्क छ । अण्डा वितरण कार्यक्रमका लागि वर्षमा पाँच लाख रुपैयाँ बजेट खर्च हुने अनुमान गरिएको छ ।

गाउँपालिकाले यसका लागि आवश्यक बजेटको व्यवस्था गर्ने प्रमुख प्रशासकीय अधिकृत चिरञ्जीवी बरालले बताए।

नौ वडा रहेको रुपा गाउँपालिकामा एक आधारभूत अस्पताल, चारवटा स्वास्थ्यचौकी र चारवटा आधारभूत स्वास्थ्य केन्द्र गरी नौवटा स्वास्थ्य संस्था छन् ।

सबै स्वास्थ्य संस्थामा सामान्य सुत्केरी गराउन सकिने गरी पूर्वाधार रहेको गाउँपालिका स्वास्थ्य शाखा प्रमुख रामचन्द्र ओझाले बताए ।

-रासस