इस्लामावाद- पाकिस्तानको बलोचिस्तान प्रान्तमा एक जना बलोचको गैरन्यायिक हत्या गरिएको भिडियो सार्वजनिक भएको छ । बलोचिस्तान टाइम्सले सामाजिक सञ्जाल ‘एक्स’ (साबिकको ट्विटर) मार्फत् उक्त भिडियो सार्वजनिक गरेको हो ।

भिडियोमा गैरन्यायिक हत्या गरिएका एक जना बलोचको परिवारलाई प्रहरीले पीडित व्यक्ति लडाकु समूहमा आबद्ध रहेको भन्ने फाराम भराउन बाध्य पारेको देख्न सकिन्छ ।

यसो भएको खण्डमा हत्या गरिएका व्यक्ति लडाकु समूहमा आबद्ध रहेको भन्ने तथ्य स्थापित हुने र हत्याराहरु जोगिने अवस्था आउने भारतीय समाचार संस्था एएनआईले जनाएको छ ।

पछिल्लो समय पाकिस्तानको बलोचिस्तान प्रान्तमा सुरक्षाकर्मीहरुबाट बलोचविरुद्ध चरम दमन हुँदै आएको बताइन्छ । बलोचिस्तानमा बारम्बार हत्या, अपहरण, जबरजस्ती बेपत्ता, बलात्कारजस्ता घटना बढ्दै गएको छ ।