काठमाडौं – चालु आर्थिक वर्षको असोजभन्दा कात्तिकमा बैंकिङ क्षेत्रको नाफा ३८ प्रतिशतले वृद्धि भएको छ ।

नेपाल राष्ट्र बैंकले सोमबार सार्वजनिक गरेको मासिक प्रतिवेदनअनुसार चालु आर्थिक वर्षको असोजको तुलनमा कात्तिकमा बैंकिङ क्षेत्रको नाफा ३८.२ प्रतिशतले वृद्धि भएको हो ।

आर्थिक वर्ष ०७९र०८० को अन्तिम महिना असारको तुलनामा गत आर्थिक वर्षको अन्तिम महिना असारमा ८.८१ प्रतिशतले घटेको बैंकिङ क्षेत्रको नाफामा पछिल्लो समय सुधार भएको तथ्याङ्कले देखाएको छ । आर्थिक वर्ष ०७८/०७९ को असारको तुलनामा आर्थिक वर्ष ०७९/०८० को असारमा बैंकिङ क्षेत्रको नाफा ६.७९ प्रतिशतले घटेको थियो ।

चालु आर्थिक वर्षको असोजमा बैंकिङ क्षेत्रले १८ अर्ब १० करोड ७० लाख रुपैयाँ नाफा आर्जन गरेकोमा कात्तिकमा सो नाफा वृद्धि भएर २४ अर्ब ९९ करोड १० लाख रुपैयाँ पुगेको छ ।

जसमध्ये वाणिज्य बैंकको नाफा २२ अर्ब २९ करोड ९० लाख, विकास बैंकको दुई अर्ब तीन करोड ७० लाख र फाइनान्स कम्पनीको ६५ करोड ६० लाख रुपैयाँ छ ।

वाणिज्य बैंकतर्फ नबिल अब्बल, पौने तीन अर्ब नाफा

गएको कात्तिकमा देशका कुल २० वाणिज्य बैंकमध्ये नबिल बैंकले सबैभन्दा धेरै अर्थात् दुई अर्ब ६९ करोड १० लाख ४० हजार रुपैयाँ नाफा गरेको छ ।

कात्तिकमा एनआइएमबी बैंकले एक अर्ब ८२ करोड २० लाख ९० हजार, प्राइम बैंकले एक अर्ब ६६ करोड ४४ लाख, एभरेष्ट बैंकले एक अर्ब ५० करोड ९३ लाख एनएमबी बैंकले एक अर्ब ४८ करोड ३२ लाख र प्रभु बैंकले एक अर्ब २३ करोड १० लाख ६० हजार रुपैयाँ नाफा आर्जन गरेका छन् ।

त्यस्तै, सोही अवधिमा स्टान्डर्ड चाटर्ड बैंकले एक अर्ब १३ करोड ७३ लाख १० हजार, कुमारी बैंकले एक अर्ब ५९ करोड ४ लाख ९० हजार र नेपाल एसबीआई बैंकले एक अर्ब सात लाख १० हजार रुपैयाँ नाफा कमाएका छन् ।

समीक्षा अवधिमा अन्य वाणिज्य बैंकको नाफा भने एक अर्ब भन्दा कम रहेको तथ्याङ्कले देखाएको छ । ग्लोबल आईएमई बैंकले आफ्नो वासलात राष्ट्र बैंकमा बुझाएको देखिँदैन ।