काठमाडौं । भारतविरुद्धको एकदिवसीय सिरिज श्रीलंकाले जितेको छ । बुधबार भएको तेस्रो तथा अन्तिम खेलमा भारतलाई ११० रनको अन्तरले हराउँदै श्रींलकाले सिरिज २–० ले जितेको हो । यसअघि पहिलो खेल बराबरीमा सकिँदा दोस्रो खेल श्रीलंकाले ३२ रनले जितेको थियो ।

जितकालागि श्रीलंकाले दिएको २४९ रनको लक्ष्य पछ्याएको भारतले २६.१ ओभरमा अलआउट हुँदै १३८ रन मात्र बनाउन सक्यो । भारतका लागि कप्तान रोहित शर्माले ३५ रन बनाएपछि टोलीको हार टार्न सकेनन् । त्यस्तै वासिङ्टन सुन्दरले ३०, विराट कोहलीले २०, रियान परागले १५ रन बनाए । अन्य खेलाडीको प्रदर्शन उल्लेखनीय रहेन ।

भारतलाई सस्तैमा समेट्न श्रीलंकाका डुनिथ भेलालागेले सर्वाधिक ५ विकेट लिए । ५.१ ओभर बलिङ गरेका उनले मात्र २७ रन खर्चिए । तेक्षाना र वान्डरसेको नाममा २२ विकेट रह्यो ।

त्यसअघि कोलम्बोस्थित आर प्रेमदासा क्रिकेट स्टेडियममा टस जितेर पहिले ब्याटिङ गरेको श्रीलंकाले निर्धारित ५० ओभरमा ७ विकेट गुमाउँदै २४८ रन बनाएको थियो । उसका लागि अविष्का फर्नान्डोले सर्वाधिक ९६ रन बनाए । १२७ बलको सामना गरेका उनले ९ चौका र २ छक्का प्रहार गरे ।

त्यस्तै कुशले मेण्डिसले ५९ ,पथुम निसान्काले ४५ तथा कामिन्दु मेन्डिसले २३ रन बनाए । यसअघ सन् १९९७ मा श्रीलंकाले भारतविरुद्धको एकदिवसीय सिरिज जितेको थियो । त्यसयता लगातार ११ ओडिआई सिरिज गुमाएको श्रीलंकाले २७ वर्षपछि सफलता हात पारेको हो ।