नयाँ दिल्ली- भारतीय अर्थमन्त्री निर्मला सीतारमणले भारत–मध्यपूर्व–युरोप आर्थिक कोरिडोर रणनीतिक एवम् आर्थिक हिसाबमा ‘निर्णायक’ हुने बताएकी छिन् । लोकसभामा सम्बोधन गर्दै मन्त्री सीतारमणले यस कोरिडोर भारतका लागि मात्रै नभएर अरु मुलुकहरुका लागि पनि महत्वपूर्ण हुने विश्वास व्यक्त गरिन् ।

भारतीय सामाचार संस्था एएनआईका अनुसार उनले यस कोरिडोर शताब्दीऔँसम्म विश्व व्यापारको आधारमा रुपमा विद्यमान रहने पनि उल्लेख गरिन् ।

यस कोरिडोरको पहल भारतीय भूमिबाट भएको विषयमा इतिहासले पनि स्मरण गर्ने उनको भनाइ छ । उनले आगामी ५ वर्षमा भारतले अभूतपूर्व विकासको आभास गर्ने पनि बताइन् ।

गत सेप्टेम्बर महिनामा भारतमा आयोजित जी२० शिखर सम्मेलनका क्रममा भारत, अमेरिका, संयुक्त अरब इमिरेट्स (यूएई), साउदी अरब, फ्रान्स, जर्मनी, इटाली र युरोपेली युनियन ईयूले भारत–मध्यपूर्व–युरोप आर्थिक कोरिडोरको स्थापना गर्ने विषयमा सम्झौतापत्रमा हस्ताक्षर गरेका थिए ।

यस कोरिडोरले भारत, पश्चिम एसिया र युरोपबीच कनेक्टिभिटी विस्तार गरी आर्थिक साझेदारीलाई विस्तार गर्ने विश्वास गरिएको छ ।