काठमाडौं – भारतले नयाँ प्रविधिमा आधारित हरित हाइड्रोजनबाट सञ्चालन हुने सवारी साधन सार्वजनिक गरेको छ । भुटानी प्रधानमन्त्री छिरिङ टोग्बेको भारत भ्रमणका क्रममा भारतीय पेट्रोलियम एवम् प्राकृतिक ग्यासमन्त्री हरदिप सिंह पुरीले हरित हाइड्रोजनबाट सञ्चालन हुने बसको उद्घाटन गरेका हुन् ।

यो बसमा जडान भएको इन्जिन हाइड्रोजनबाट सञ्चालन हुन्छ । हाइड्रोजन र हावामा रहेको अक्सिजनबाट उत्पादन हुने ऊर्जाबाट बस सञ्चालन हुने भारतीय सञ्चार माध्यमले जनाएका छन् ।

यसबाट धुवाँ नभइ पानी निस्किने जनाइएको छ । हरित हाइड्रोजनबाट सञ्चालन हुने बसलाई चाँडै सार्वजनिक सवारीका रुपमा प्रयोग गरिने अपेक्षा गरिएको छ ।

आगामी पुस्ताका लागि हरित र दीगो ऊर्जा उत्पादनमा नयाँ प्रविधि प्रभावकारी हुने अपेक्षा गरिएको छ । भारतले सन् २०७० सम्म शून्य कार्बन उत्सर्जन गर्ने लक्ष्य लिएको छ ।