काठमाडौं – भारतीय कम्पनी टाटाले दुई वर्षपछि सी–२९५ विमान आपूर्ति गर्ने भएको छ । टाटा सन्सका प्रमुख एन चन्द्रशेखरनले गुजरात राज्यको बडोदरामा रहेको कारखानाले सन् २०२६ सम्म सी–२९५ विमान आपूर्ति गर्ने लक्ष्य लिएको जनाएका छन् ।

टाटाले विमान उत्पादनकर्ता एयरबससँगको सहकार्यमा बडोदरामा कारखाना स्थापना गरेको हो । भारतीय प्रधानमन्त्री नरेन्द्र मोदी र उनका स्पेनी समकक्षी पेद्रो सान्चेजले कारखानाको उद्घाटन गरेका छन् ।

भारतमा सञ्चालित यो निजी क्षेत्रको पहिलो विमान उत्पादन कारखाना हो । चन्द्रशेखरनले यो कारखाना भारतीय हवाई तथा रक्षा क्षेत्रका लागि कोशेढुंगा रहेको टिप्पणी गरेका छन् । यस कारखानाले भारतलाई आधुनिक उत्पादन प्रक्रियाको नयाँ चरणमा प्रवेश गराउने उनको भनाइ छ ।

भारतीय आर्थिक अनलाइन पोर्टल इकोनोमिक टाइम्सका अनुसार उनले कारखानामा काम गर्न लागेका २ सय जना इन्जिनियरले स्पेनमा तालिम लिइरहेको समेत जानकारी दिएका छन् । प्रधानमन्त्री मोदीको ‘मेक इन इण्डिया’ कार्यक्रमअन्तर्गत नयाँ विमान उत्पादन कारखाना स्थापना गरिएको हो ।