काठमाडौं- चीनको कोस्ट गार्ड पहिलो पटक आर्कटिक महासागरमा प्रवेश गरेको छ । चीनको कोस्ट गार्डले रुसी सेनासँग संयुक्त गस्तीका क्रममा पहिलो पटक आर्कटिक पुगेको जनाएको छ ।

अमेरिकी कोस्ट गार्डले बेरिङ सागरमा रुसी सीमा गार्ड र चिनियाँ तटरक्षक गार्डका चारवटा जहाज भेट्टाएको दाबी गरेको एक दिनपछि चीनले पहिलो पटक आर्कटिकमा पुगेको पुष्टि गरेको हो ।

संयुक्त गस्तीले कोस्ट गार्डको महासागर जाने नेभिकको प्रभावकारी विस्तार गरेको जनाएको छ । नयाँ ठाउँमा पहिलो पटक आफ्नो मिसन पूरा गर्न क्षमताको परीक्षण गरेको चीनको कोस्ट गार्डले जनाएको छ ।

चीनको कोस्ट गार्ड आर्कटिकको कुन ठाउँमा पुगेको खुलाइएको छैन । तस्बिरहरूमा एउटा जहाजको ब्यानरमा ‘चिनियाँ कोस्ट गार्डमा आफ्नो हृदय समर्पित गर्दै: आर्कटिक महासागरमा वफादारी प्रदर्शन गर्दै’ भन्ने लेखिएको छ ।

रुसी सरकारले आधिकारिक रूपमा गस्तीलाई पुष्टि गरेको छैन । चिनियाँ सरकारी प्रसारक सीसीटीभीले केही दिनअघि यसबारे समाचार बजाएको छ । रुसी मिडिया तासले चिनियाँ कोस्ट गार्डको भनाइ उद्धृत गर्दै गस्तीबारे एक समाचार लेखेको छ ।

अमेरिकी कोस्ट गार्डले रूसी सीमा गार्ड र चिनियाँ कोस्ट गार्डका चार जहाजहरू शनिबार रुसको विशेष आर्थिक क्षेत्रभित्र करिब पाँच माइलको बेरिंग सागरस्थित उत्तरपूर्वी दिशामा गइरहेको देखेको बताएको थियो ।

बेरिङ सागर रूस र अलास्काबीच फैलिएको छ, यो उत्तरी प्रशान्त महासागरको एक भाग हो । यो बेरिङ स्ट्रेटमार्फत आर्कटिक महासागरसँग जोडिएको छ, एशिया र उत्तर अमेरिकालाई छुट्याउने यो एउटा साँघुरो बाटो हो ।

अमेरिकाले हालैका यी गतिविधिले आफ्ना रणनीतिक प्रतिद्वन्द्वीहरूले आर्कटिकमा चासो बढाएको देखाएको टिप्पणी गरेको छ ।

अमेरिकाले रणनीतिक र वातावरणीय रूपमा संवेदनशील आर्कटिकमा चीनको बढ्दो भूमिका र रुससँगको समन्वयबारे चिन्ता व्यक्त गरेको छ । रुस र चीनले पछिल्ला वर्षहरूमा आफ्नो सुरक्षा र आर्थिक सम्बन्धलाई व्यापक मात्रामा बढाएका छन् ।