काठमाडौं – श्रीलंकाविरुद्धको एकदिवसीय श्रृङलाको दोस्रो खेलमा भारत पराजित भएको छ । आइतबार कोलम्बोस्थित आर प्रेमदासा क्रिकेट स्टेडियममा भएको खेलमा भारत ३२ रनले पराजित भएको हो ।

जितका लागि २४१ रनको लक्ष्य पछ्याएको भारत ४२.२ ओभरमा अलआउट हुँदै मात्र २०८ रन बनायो । भारतका लागि कप्तान रोहित शर्माले सर्वाधिक ६४ रन बनाए । त्यस्तै अक्षर पटेलले ४४, शुभमन गिलले ३५ रनको योगदान दिए । अन्य खेलाडीको ब्याटिङ उल्लेखनीय रहेन् । श्रीलंकका लागि जेफ्री वान्डरसेले ३३ रन खर्चिएर सर्वाधिक ६ विकेट हात पारे । चरित असालान्काले ३ विकेट लिए ।

त्यसअघि टस जितेर पहिले ब्याटिङ गरेको श्रीलंकाले निर्धारित ५० ओभरमा ९ विकेट गुमाउँदै २४० रन बनाएको थियो । उसका लागि कामिन्दु मेन्डिस र अविष्का फर्नान्डोले समान ४० रन बनाए । त्यस्तै कुसल मेन्डिसले ३० रन बनाए ।

भारतका लागि वासिङ्टन सुन्दरले तीन तथा कुलदीप यादवले दुई विकेट लिए । यसअघि सिरिजकाे पहिलाे खेल बराबरीमा सकिएकाे थियाे । याेसँगै श्रीलंकाले १-० काे अग्रता बनाएकाे छ ।