पोखरा-कास्कीको माछापुच्छ्रे गाउँपालिकामा अवस्थित मर्दी हिमाल आधार शिविरमा एउटा मानव अवशेष भेटिएको छ ।

माछापुच्छ्रे गाउँपालिका–९ का वडाध्यक्ष हरिबहादुर क्षत्रीका अनुसार स्थानीय पर्यटन व्यवसायीले शुक्रबार साँझ मानव अवशेष भेटिएकोबारे शनिबार जानकारी दिएका थिए ।

क्षत्रीका अनुसार कपडासँगै मानव अस्थिपञ्जर भेटिएको छ । ‘स्थानीयले अवशेष देखेर खबर गर्नुभएको छ । विकट स्थान भएकाले ल्याउने उपायबारे प्रहरी र गाउँपालिकासँग सल्लाह गर्दैछौँ’ वडाध्यक्ष क्षत्रीले भने ।

ती पर्यटकको अवशेषसँगै एउटा आईफोन, च्यातिएको अवस्थामा कपडाहरू, स्लिपिङ ब्याग लगायत सामग्री भेटिएका छन् ।

भेटिएको अवशेष २०८० पुस १३ गते मर्दी पदयात्राका क्रममा हाइक्याम्पबाट हराएका स्वीडेनका २० वर्षीय मिचल लिउ ब्लोम्बर्ग हुनसक्ने आशंका छ ।
पदमार्गको माथिल्लो क्याम्पबाट मर्दी आधार शिविरतर्फ जाने क्रममा हराएका मिचलको खोजी गरिएको थियो। तर त्यसेबला खोजी गरिए पनि उी भेटिएका थिएनन् ।