काठमाडौं- नेपाली कांग्रेसका युवा नेता एवं प्रतिनिधिसभा सदस्य प्रदीप पौडेलले प्रधानमन्त्री पुष्पकमल दाहाल प्रचण्डले नेपाली राजनीतिक इतिहासमा अस्थिरताको अर्को श्रृङ्खला थपेको टिप्पणी गरेका छन् ।

सोमबार सामाजिक सञ्जालमा पोस्ट गर्दै नेता पौडेलले अहिले फेरिएको गठबन्धनले अस्थिरताको अर्को श्रृङ्खला थपेको भन्दै यसको नेतृत्व स्वयं प्रचण्डले गरेको टिप्पणी गरेका हुन् ।

उनले लेखेका छन्, ‘अहिले फेरिएको गठबन्धनले नेपाली राजनीतिक इतिहासमा अस्थिरताको अर्को शृंखला थपेको छ । जसको नेतृत्व स्वयं प्रधानमन्त्रीले गरेका छन् ।’

नेता पौडेलले यस्ता घटना र नेतृत्वकर्ताको व्यवहारले लामो समयदेखि नेपाली नागरिकले खोजेको राजनीतिक स्थिरता र विकासको स्वाद अझै केही समय पाउन नसक्ने प्रष्ट संकेत देखिएको उनको भनाइ छ । उनले कुनै व्यक्ति, पात्र वा पार्टी, कसले के पाए वा गुमाए भन्दा जटिल र गहन सवाल देशले के पायो भन्ने रहेको उल्लेख गरेका छन् ।