काठमाडौं- नेपाली कांग्रेसका सभापति शेरबहादुर देउवाले अहिले देशमा देखिएको चुनौती सामना गर्न पार्टीलाई एकतावद्ध बनाउर अघि बढाउनुपर्ने बताएका छन् ।

नेपाल लोकतान्त्रिक खेलकुद संघको १० औँ स्थापना दिवसको अवसरमा शुक्रबार काठमाडौंमा आयोजित कार्यक्रममा देउवाले यस्तो बताएका हुन् ।

उनले अहिले देशभित्र निकै चुनौती देखिएको भन्दै यसलाई सामना गर्न पार्टीका सबैजना एकताबद्ध भएर अघि बढ्नुपर्ने बताएका छन् ।

यसअघि जस्तै अहिलेको चुनौती समाधान गर्न कांग्रेस सफल हुने विश्वास उनले जनाए ।

सभापति देउवाले देशमा खेलकुदप्रति युवाहरूको आकर्षण रहेको भन्दै यस क्षेत्रको विकासमा सबै गम्भीर भएर लाग्नुपर्ने पनि उल्लेख गरे।

कार्यक्रममा कांग्रेस उपसभापति धनराज गुरुङले खेलकुदमा जस्तै नेपाली राजनीतिमा अनुशासन कायम गर्नुपर्ने बताए ।

उनले गालीको राजनीतिका कारण दलहरूबीच तिक्तता खडा भएको बताउँदै नेपालको राजनीति गम्भीर घुम्तीमा पुगेको उल्लेख गरे ।

उनले राजनीतिलाई सही ट्रयाकमा ल्याउने काम कांग्रेसकै भएकाले निराशालाई आशामा बदल्ने जिम्मेवारी पूरा गर्नुपर्नेमा जोड दिएका छन् ।