तनहुँ – प्रथम राष्ट्रिय दरै कपको उपाधि दुम्सी दरै इकाइ व्यास–१० ले जितेको छ । नेपाल दरै समाज तनहुँले आयोजना गरेको दरै कप सेभेन ए साइड फुटबल प्रतियोगिताको आज सम्पन्न फाइनलमा आयोजक दरै समाज तनहुँलाई हराउँदै दुम्सीले उपाधि जितेको हो ।

निकै प्रतिस्पर्धात्मक खेलमा दुम्सी ट्राइबेकरमार्फत विजयी भएको हो । दुम्सीले आयोजक दरै समाजलाई ट्राइबेकरमा ५–४ गोल अन्तरले पराजित गरेको छ । निर्धारित समयमा दुवै टोलीबाट गोल हुन नसकेपछि खेल ट्राइबेकरमा धकेलिएको थियो ।

निर्धारित समयमा दुवै टोलीका लागि गोल गर्ने अवसर भए पनि त्यसको सदुपयोग हुन सकेन ।आजै भएको सेमिफाइनलमा चितवनको मङ्गलपुरलाई हराउँदै दुम्सी दरै इकाइ व्यास–१० फाइनलमा पुगेको थियो । उक्त खेलमा दुम्सी दरै इकाइ २–० ले विजयी भएको थियो ।

दोस्रो सेमिफाइनल खेलमा साँखर दरै इकाइ व्यास–४ लाई हराउँदै आयोजक दरै समाज तनहुँ फाइनल पुगेको थियो । उक्त खेलमा दरै समाज १–० गोलले विजयी भएको थियो । उपाधिसँगै दुम्सी दरै इकाइले रु एक लाख एक हजार एक सय ११ र ट्रफी प्राप्त गरेको छ । उपविजेता दरै समाज तनहुँ भने रु ५१ हजार एक सय ५१ नगद र ट्रफी हात पारेको छ ।

दरै जातिका युवामात्र सहभागी उक्त प्रतियोगिता यही माघ १५ गतेदेखि सुरु भएको थियो । प्रतियोगितामा छवटा जिल्लाका २३ समूहको सहभागिता थियो । प्रतियोगितामा तनहुँ, चितवन, नवलपुर, गोरखा, धादिङ र पाल्पाका दरै समुदायका खेलाडीको सहभागिता रहेको दरै समाज तनहुँका सचिव विजय दरै जानकारी दिए ।

नेपालका १३ जिल्लामा दरै समुदायको बसोबास रहेकामा करिब २० हजार जनसङ्ख्या छ ।दरै जातिका युवामा खेलकुदप्रति आकर्षित गराउन प्रतियोगिता आयोजना गरिएको समाजका अध्यक्ष ठाकुर दरैले जानकारी दिए ।