काठमाडौं– उपेन्द्र सुब्बाको लेखन र निर्देशनमा बनेको फिल्म ‘मनसरा’को बुधबार रेड कार्पेट प्रिमियर शो सम्पन्न भएको छ । ललितपुरको जावलाखेलमा भएको शो ५ सय बढीले हेरेका थिए ।

फिल्मका कलाकारहरु रेड कार्पेटमा हिँडिरहँदा अभिनेता दयाहाङ राई भने प्रिमियरमा अनुपस्थित रहे । उनी अघिल्लो फिल्म ‘डिग्री माइला’को कार्यक्रमका लागि विदेश यात्रामा रहेकाले प्रिमियरमा अनुपस्थित रहेको निर्माण पक्षले जनायो ।

निर्देशक सुब्बाले खबरहबसँग भने, ‘उहाँ हङकङ जानुभएको छ । कार्यक्रमकै लागि जानुपर्ने भएकाले प्रिमियरमा उपस्थित हुन भ्याउनुभएन ।’

प्रिमियरमा चलचित्रकर्मी, पत्रकार र विशेष अथितिहरुको बाक्लो उपस्थिति थियो । निर्देशकहरु निश्चल बस्नेत, प्रदीप भट्टराई लेखक तथा निर्देशक खगेन्द्र लामिछाने, अभिनेताहरु कर्मा शाक्य, विजय बराल, अभिनेत्री सुरक्षा पन्तलगायत कार्यक्रममा उपस्थित थिए ।

प्रिमियरपछि फिल्मले उत्कृष्ट प्रतिक्रिया पाएको छ । सुब्बाको यस फिल्मबाट दर्शक निराश बन्नु नपर्ने चलचित्रकर्मीहरुको प्रतिक्रिया छ ।

फिल्ममा अभिनेता प्रवीण खतिवडा र अभिनेत्री मिरुना मगर केन्द्रीय भूमिकामा छन् ।

अभिनेता दयाहाङ मुख्य भूमिकामा छन् भने गायक सत्यराज आचार्य र कवि विप्लव प्रतीक विशेष भूमिकामा देखिएका छन् ।

बड्डी फिल्मको ब्यानरमा बनेको ‘मनसरा’का निर्माता छायाँकार शैलेन्द्र ध्वज कार्की हुन् ।