नयाँदिल्ली- भारतको तेलङ्गना राज्यमा भएको भिडन्तमा सातजना माओवादी मारिएका छन् ।

तेलङ्गानाको मुलुगु जिल्लामा सुरक्षाबल र नक्सलबीच मुठभेड हुँदा सातजना माओवादी लडाकु मारिएका हुन् ।

यो मुठभेड माओवादीले जासुसी आरोपमा दुईजना आदिवासीहरूको हत्या गरेको एक सातापछि भएको हो ।

सुरक्षाबलहरूले ठूलो परिमाणमा हतियार बरामद गरेको जनाएका छन् । पुलिसले घटनास्थलबाट एक-४७ र इन्सास राइफल बरामद गरेको छ ।

पुलिसका अनुसार एतुरनगरमको वन क्षेत्रमा सर्च अप्रेशनका क्रममा तेलङ्गाना पुलिसको विशिष्ट नक्सल प्रतिरोधी बल ‘ग्रेहाउन्ड्स’ र माओवादीबीच भिडन्त भएको हो ।

पुलिसका एक वरिष्ठ अधिकारीका अनुसार मुठभेडस्थलबाट दुईवटा एके ४७ राइफल पनि बरामद भएका छन् ।

अधिकारीकाअनुसार मारिनेहरूमा प्रतिबन्धित भाकपा (माओवादी) को तेलङ्गाना राज्य समिति (येलन्डु नरसामपेट) का सचिव कुरसाम मङ्गू उर्फ ​​भद्रू पनि सामेल छन् ।