काठमाडौँ- उत्तरपूर्वी भारतको अरुणाचल प्रदेश राज्यमा तीन नयाँ प्रजातिको भ्यागुता फेला परेका छन् ।

भारतको जुलोजिकल सर्भे (जेडएसआई) र सेन्ट एन्थोनी कलेज, शिलोङका खोजकर्ताहरुले अरुणाचल प्रदेशमा तीन प्रजातिका भ्यागुता फेला पारेका हुन् ।

ती भ्यागुताको प्रजातिको नामकरण पनि भएको इस्टमोजोले जनाएको छ । यसअनुसार भ्यागुताको एउटा प्रजातिको नाम तवाङ, अर्कोको नाम सेसा अर्किड अभयारण्य र तेस्रोको मौर्य साम्राज्यका चाणक्यको नाममा नामकरण गरिएको छ ।

वैज्ञानिक हिसाबमा तीन वटै नयाँ प्रजातिहरू वास्तविक भ्यागुता परिवार रानिडेसँग सम्बन्धित रहेको जनाइएको छ । यी नयाँ प्रजातिहरूलाई अमोलोप्स चाणक्य, अमोलोप्स तवाङ र अमोलोप्स टेराओर्किस नाम दिइएको छ ।

भारतीय सञ्चारमाध्यमका अनुसार यीमध्ये अमोलोप्स चाणक्य अरुणाचलको दिराङमा फेला परेको हो भने अमोलोप्स तवाङ तवाङमा फेला परेको हो । त्यसैगरी, अमोलोप्स टेराओर्किस भने सेसा अर्किड आरक्षामा फेला परेको हो ।