वेलिङ्टन- न्युजिल्याण्डले चीनमाथि जासुसीको आरोप लगाएको छ । अन्तर्राष्ट्रिय समाचार संस्था एएफपीका अनुसार न्युजिल्याण्डको सुरक्षा गुप्तचर सेवाले चीनमाथि जासुसी र वाह्य हस्तक्षेपको आरोप लगाएको हो ।

उक्त गुप्तचर सेवाको प्रतिवेदनमा चीनले न्युजिल्याण्डमा बसोबास गर्दै आएका चिनियाँ नागरिकमाथि निगरानी गर्दै आएको समेत जनाइएको छ ।

अमेरिका, क्यानाडा, बेलायत र अस्ट्रेलियासँगै न्युजिल्याण्ड ‘फाइभ आइज’ भनिने गुप्तचर गठबन्धनको सदस्यसमेत हो । यद्यपि चीनप्रति नरम नीति लिएको भन्दै पछिल्लो समय न्युजिल्याण्डको आलोचनासमेत हुँदै आएको थियो ।

आफ्नो सबैभन्दा ठूलो व्यापारिक साझेदार रहेको चीनलाई चिढ्याउन नचाहेको अर्थमा न्युजिल्याण्डको नरमपनालाई लिने गरिएको थियो । सन् २०१९ मा न्यूजिल्याण्डको क्राइस्टचर्चमा रहेको एक मस्जिदमा भएको गोलीकाण्डपछि न्यूजिल्याण्डले उच्च सुरक्षा सतर्कता अपनाइरहेको बताइन्छ ।