ढाका- बंगलादेशमा रहेको एक निर्माणाधीन ऊर्जा केन्द्रमा बंगलादेशी र चिनियाँ कामदारबीच झडप हुँदा १५ जना घाइते भएका छन् । बंगलादेशको पटुवाखली जिल्लाको धनखली क्षेत्रमा निर्माणाधीन ऊर्जा केन्द्रमा चिनियाँ र बंगलादेशी कामदारबीच झडप भएको भारतीय समाचार संस्था एएनआईले जनाएको छ ।

ज्यालाका विषयलाई लिएर दुई पक्षबीच उत्पन्न विवाद झडपमा परिणत भएको जनाइएको छ । झडपका क्रममा ऊर्जा केन्द्रका सवारी साधन र कार्यालयमा तोडफोडसमेत भएको थियो ।

उक्त निर्माणाधीन ऊर्जा केन्द्रले कोइलाबाट १३२० मेगावाट विद्युत उत्पादन गर्ने लक्ष्य लिइएको छ । झडपका क्रममा चार जना बंगलादेशी कामदार गम्भीर घाइते भएको बंगलादेशको राजधानी ढाकाबाट प्रकाशित हुने न्यू एज अखबारले जनाएको छ ।