मनिला- फिलिपिन्सले चीनमाथि साना देशलाई धम्क्याएर आफ्नो अधीनमा राख्न खोजेको आरोप लगाएको छ । दक्षिण चीन सागरमा दुई मुलुकका नौसैनिक पानीजहाज आमने सामने भएसँगै फिलिपिन्सले चीनमाथि यस्तो आरोप लगाएको हो ।

फिलिपिन्सले दक्षिण चीन सागरमा आफ्नो नौसैनिक गतिविधिलाई निरन्तरता दिनेसमेत दृढता व्यक्त गरेको छ । चीन र फिलिपिन्सबीच दक्षिण चीन सागरमा रोकिराखेको एउटा पानीजहाजलाई लिएर विवाद उत्पन्न भएको छ । सन् १९९९ यता स्प्राट्ले टापुनजिकैको सेकेण्ड थोमस शोलमा फिलिपिन्सले बीआरापी सिएर माद्रे पानीजहाजलाई रोकेर राखेको छ ।

त्यस स्थीर पानीजहाजमा तैनाथ फिलिपिनी नौसैनिकलाई आवश्यक पर्ने बन्दोबस्तीका सामान आपूर्ति गर्न चिनियाँ पानीजहाज र डुङ्गाहरुले अवरोध उत्पन्न गर्दै आएका छन् ।

सो क्षेत्रमा चीनले आफ्नो सार्वभौमिकता दाबी गर्दै आएको छ । केही समयअघि चीनले उक्त स्थीर पानीजहाजलाई त्यस ठाउँबाट हटाउन फिलिपिन्सलाई चेतावनी दिएको थियो । अहिले सो पानीजहाजको विषयलाई लिएर दुई मुलुकबीच तनाव उत्पन्न हुँदै आएको छ ।

‘चीनले आफ्नो शक्तिलाई प्रयोग गरेर साना मुलुकहरुलाई आफ्नो अधीनमा राख्ने उद्देश्य लिएको छ ।’ फिलिपिनी सेनाका प्रवक्ता कर्णेल मेदेल अग्युलरले बेलायती अखबार द गार्जियनलाई बताए । उनका अनुसार बीआरपी सिएर माद्रेलाई कतै नलैजाने र त्यहीँ राख्ने विषयमा राष्ट्रपति फर्डिनान्ड मार्कोस जुनियर स्पष्ट छन् ।