दोहा– खाडी मुलुक ओमानमा घरेलु कामदारको रूपमा रोजगारी दिलाउने प्रलोभनमा पारी त्यहाँ पुर्याएकी संखुवासभाकी एक महिलालाई बन्धक बनाएको तथ्य खुलेको छ ।
गत जेठ ५ गते संखुवासभा खाँदबारी नगरपालिका वडा नम्बर–१ घर भएकी सपना दर्जी परियारलाई दलालले राम्रो रोजगारी दिलाउने प्रलोभन देखाएर ओमान पुर्याई बन्धक बनाएको भन्दै उद्धारको लागि याचना गरेकी छिन् ।
घरेलु कामका लागि त्यहाँ पुगेकी उनी बिरामी भएर काम गर्न नसक्ने भएपछि विगत ३ महिनादेखि बन्धक अवस्थामा रहेकी छिन् । उनले उद्धारका लागि अनुरोध गरेको भएपनि उनलाई ओमान पठाउने एजेन्ट मनमाया राईले बेवास्ता गरेको उनका श्रीमान टेक बहादुर परियारले बताए ।
दर्जीलाई घर मालिकले बन्धक बनाएर राखेपछि एजेन्ट राईलाई सम्पर्क गर्दा दुई लाख पचास हजार रुपैयाँ दिए उद्धार गरी नेपाल फर्काउन सकिने जवाफ दिएको श्रीमान परियारले बताए ।
आफूसँग यति धेरै पैसा बुझाउने क्षमता नभएको र एजेन्टले उद्धारमा कुनै चासो नदिएपछि गैरआवासी नेपाली संघ (एनआरएनए) ओमानलाई एक निवेदन लेख्दै उद्धारका लागि अनुरोध गरिएको उनले बताए ।
दर्जीलाई घर मालिकले बन्धक बनाएको जानकारी पाएपछि मास्कस्थित नेपाली दूतावासले उनको खोजी गरी उद्धार गर्ने प्रतिबद्धता जनाएको छ । उनलाई फोन सम्पर्क गरी खोजीकार्य गर्ने काम शुक्रबारबाटै थालिएको दूतावासकी तृतीय सचिव कविता खनालले बताइन् ।
यसैबीच, दर्जी बिरामी नभई काम गर्न नसकेर बसेकाले आवश्यक रकम जुटाएर चाँडै नेपाल झिकाउने एजेन्ट मनमाया राईले बताइन् । पीडित भनिएकी महिलाले भनेजस्तो नभइ काम गर्न नसकेर उनलाई ओमानमा रहेको एजेन्टले अफिसमा लागेर राखेको उनको भनाइ छ ।
सरकारले मलेसिया तथा खाडीमा घरेलु कामदार पठाउन रोक लगाए पनि झन्डै चार लाखको हाराहारीमा महिलाहरू त्यहाँ घरेलु कामदारका रूपमा रहेका छन् । नेपालीहरू घरेलु कामदारका रूपमा जाने प्रमुख गन्तव्य मुलुकहरू ओमान, कुवेत, साउदी अरब, यूएई, लेबनान, जोर्डन लगायतका देशहरूमा पुगेका छन् ।
सरकारले खाडी मुलुकमा घरेलु कामदार पठाउन प्रतिबन्ध लगाएपनि अवैध बाटोबाट विदेश पठाउने क्रम बढ्दा मानव तस्करहरू मालामाल बनिरहेका छन् ।
नेपालबाट विभिन्न म्यानपावर एजेन्टहरूले भारत, बङ्लादेश, दुबई तथा श्रीलंका लगायत अन्य देशको बाटो प्रयोग गरेर नेपाली महिला कामदारहरू पठाउने गरेका छन्।
प्रतिक्रिया