काठमाडौँ– च्याम्पियन्स लिग फुटबलमा इंग्लिस क्लब म्यानचेस्टर सिटी लिगको अन्तिम १६ मा प्रवेश गरेको छ । गएराति भएको समूह ‘जी’ को खेलमा रेट स्टारलाई ३–२ गोलले पराजित गर्दै सिटी अन्तिम १६ मा उक्लिएको हो ।

सिटीको जितमा मिच ह्यामिल्टन, ओस्कर बोब र काल्भिन फिलिप्सले एक–एक गोल गरेका थिए । यस्तै, रेड स्टारकरका लागि हाङ बिओम र एलेक्जेन्डर काटीले एक–एक गोल फर्काएका थिए ।

यो जितसँगै अपराजित रहेको सिटी ६ खेलबाट १८ अंकसहित समूह तालिकाको शीर्षस्थानमा रहँदै अन्तिम १६ मा पुगेको छ । पराजित भएको रेड स्टार १ अंकका साथ पुछारमा रहँदै प्रतियोगिताबाट बाहिरिएको छ ।

यसैगरी समूह ‘जी’ मै रहेको आरबी लाइपजिङ पनि अन्तिम १६ मा उक्लिएको छ । लाइपजिङले गएरातिको खेलमा योङ ब्वाइजलाई २–१ गोलले हराउँदै १२ अंक बनाएको थियो ।