मुजफ्फरवाद- पाकिस्तान अधिनस्थ कश्मीरमा व्यापक सरकार विरोधी प्रदर्शन भएको छ । भारी वर्षाको परवाह नगरी हजारौँ विद्यार्थीले पाकिस्तान अधिनस्थ कश्मीरमा प्रदर्शन गरेका हुन् ।

आफ्नो क्षेत्रमा कायम अन्याय, मुद्रास्फीति, उच्च बेरोजगारी र बढ्दो उग्रवाद नियन्त्रण गर्न नसकेको भन्दै पाकिस्तान सरकारविरुद्ध विद्यार्थीहरुले प्रदर्शन गरेका हुन् ।

प्रदर्शनकारीले सन् १९६२ मा कश्मीरमा निःशुल्क विद्युत प्रदान गर्ने पाकिस्तान सरकारले गरेको बाचा पूरा नभएकोसमेत जनाएका छन् । उनीहरुले गहुँको पिठोलगायत अत्यावश्यक खाद्यान्नमा अनुदान दिनसमेत सरकारसँग माग गरेका छन् ।

भारतीय समाचार संस्था टाइम्स अफ इन्डियाले जनाएअनुसार पछिल्लो समय बढ्दो महङ्गी, दण्डहीनता र आर्थिक चुनौतिका कारण पाकिस्तान अधिनस्थ कश्मीरमा सरकारप्रति आक्रोश बढ्दै गएको छ ।

प्रदर्शनमा विद्यार्थीसँगै मजदुर, नागरिक समाजका सदस्यहरु, स्थानीय बासिन्दाहरुको समेत सहभागिता रहेको थियो ।