काठमाडौं– वैदेशिक रोजगारीका लागि विभिन्न मुलुक पठाइदिन्छु भन्दै रकम ठगी गरेको अभियोगमा प्रहरीले पाकिस्तानी र अजरबैजनी नागरिक पक्राउ गरेको छ ।

पक्राउ पर्नेहरूमा पाकिस्तानका नाजिर मोहमद र अजरबैजका आयसेल हुसेनिल रहेका छन् । उपत्यका अपराध अनुसन्धान कार्यालयबाट खटिएको प्रहरीले उनीहरुलाई मंगलबार ठमेलबाट पक्राउ गरेको हो ।

उनीहरूले बैदेशिक रोजगारको लागि चेक रिपब्लिक, नर्वे, पोल्याण्ड, पोर्चुगल लगायतका देशमा पठाई दिन्छु भनि वर्कपर्मिट लगायतका नक्कली कागजातहरू देखाई विश्वासमा पारी ठगी गर्ने गरेको प्रहरीले जनाएको छ । प्रतिव्यक्ति एक लाख ३३ हजारका दरले ८० लाख रुपैयाँ उनीहरुले ठगी गरेको अनुमान छ ।

उनीहरूलाई थप अनुसन्धान तथा कारवाहीका लागि जिल्ला प्रहरी परिसर, टेकु काठमाडौँमा पठाईएको छ ।