श्रीनगर- भारतको जम्मु कश्मीरमा आयोजना हुने पवित्र अमरनाथ यात्रामा यस वर्ष पनि लाखौँ श्रद्धालु सहभागी भएका छन् । यस वर्षको अमरनाथ यात्रामा अघिल्लो वर्षभन्दा धेरै श्रद्धालु सहभागी भएका छन् ।

गत वर्ष ३ लाख ६५ हजार ७ सय २१ जना श्रद्धालुले अमरनाथ यात्रा गरेकोमा यस वर्ष चार लाखभन्दा धेरै श्रद्धालुले अमरनाथको यात्रा गरेको भारतीय समाचार संस्था एएनआईले जनाएको छ ।

यस वर्षको यात्रामा प्रख्यात ब्याडमिन्टन खेलाडी साइना नेहवाल र बलिउड नायिका सारा अली खान पनि सहभागी थिइन् । यसबाहेक पहिलेको तुलनामा यस वर्ष अमरनाथ यात्रा गर्ने विदेशीको सङ्ख्यामा पनि वृद्धि भएको एएनआईले जनाएको छ ।

१२ किलोमिटर दूरीको यस अमरनाथ यात्रालाई हिन्दू धर्ममा निकै महत्वपूर्ण मानिन्छ । १३ हजार फिटको उचाईमा अमरनाथ गुफामा रहेको मन्दिरसम्मको यात्रा निकै कष्टपूर्ण हुने बताइन्छ ।