नयाँ दिल्ली- भारत र मंगोलियाका सैनिकले संयुक्त रुपमा सैन्य अभ्यास गरेका छन् । दुई मुलुकका सैनिकले ‘नोमाडिक एलिफेन्ट २३’ नामक संयुक्त सैन्य अभ्यास गरेका हुन् । भारतीय सेनाको सूचना महानिर्देशनालयले सैन्य अभ्यासबारे जानकारी दिएको हो ।

अभ्यासमा सहभागी हुन भारतीय सेनाका ४३ सैनिकहरु मंगोलियाको राजधानी उलानबटार पुगेका थिए । उनीहरु भारतीय वायुसेनाको सी १७ लडाकु विमानमार्फत् मंगोलिया पुगेको भारतीय समाचार संस्था एएनआईले जनाएको छ ।

सकारात्मक सैन्य सम्बन्धको विकास, उत्कृष्ट अभ्यासको आदान प्रदान र दुई मुलुकका सेनाबीच मित्रता कायम राख्नका लागि संयुक्त अभ्यासको आयोजना गरिएको भारतीय रक्षा मन्त्रालयले जनाएको छ ।

रक्षा मन्त्रालयले विज्ञप्ति जारी गर्दै संयुक्त राष्ट्रसंघको म्यान्डेटअनुसार पहाडी इलाकामा आतंकवादविरुद्धको कारवाही गर्ने विषयलाई प्राथमिकता दिँदै अभ्यास गरिएको जनाएको छ ।

यसअघि सन् २०१९ मा पनि दुई मुलुकका सेनाले संयुक्त सैन्य अभ्यास गरेका थिए ।