काठमाडौँ- कानून व्यवसायीहरुले न्यायालयको शुद्धीकरणका लागि भन्दै मंगलबार पनि प्रदर्शन गरेका छन् ।

ललितपुर अदालतमा कार्यरत नायव सुब्बा प्रेमिका तमाङ र अधिवक्ता अमीर तामाङबीचको विवादलाई लिएर कानून व्यवसायीले मंगलबार पनि आन्दोलनलाई कायमै राखेका हुन् ।

नेपाल बार एशोसिएसन परिसरमा उनीहरुले प्रदर्शन गर्दै उक्त घटनाको निष्पक्ष छानबिन हुनुपर्ने माग राखेका छन् । उनीहरुले न्यायभित्रको भ्रष्टाचार, विकृति, विसंगति अन्त्य गर्नुपर्ने, अधिवक्ता अमिर लामिछाने विरुद्ध दायर सम्पूर्ण मुद्दाहरु अबिलम्व फिर्ता गर्नुपर्ने, पूर्ण स्वचालित पेशी व्यवस्थापन प्रणाली लागू गर्नुपर्नेलगायतका माग राखेका छन् ।

ललितपुर बारले घटनाको सत्यतथ्य छानबिन गरी दोषीलाई कारबाहीको माग गरेपनि अदालत प्रशासनले सीसीटीभी फुटेज निकाल्न नमान्दा विवाद उत्कर्षमा पुगेको हो ।

नासु तामाङविरुद्ध प्रमाण रहेको भन्दै अदालत प्रशासनले फुटेज निकाल्न नमानेको कानून व्यवसायीहरुको आरोप छ । यता ललितपुर अदालतका न्यायाधीश र कर्मचारीहरु भने सुरक्षाको माग राख्दै मंगलबार सर्वोच्च अदालत आएका छन् ।