काठमाडौं- कोलम्बियाको मेडेलिन शहर नजिकैको प्रमुख विमानस्थलमा एक हवाईजहाजको आपतकालीन अवतरणपछि हजारौँ यात्रु प्रभावित भएका छन् ।

ल्याटिन अमेरिकन एयरलाइन्स (ल्याटम) को एयरबस ए ३२०-२०० विमानको अगाडिको ल्यान्डिङ गियर टेकअफको केही समयपछि खस्दा उक्त विमान रियोनेग्रो शहरको होजे मारिया कोर्डोभा अन्तर्राष्ट्रिय विमानस्थलमा आपतकालीन अवतरणको लागि फिर्ता भएको थियो ।

यसकारण उडान र अवतरण रद्द हुँदा २१,००० भन्दा बढी यात्रु र १३६ उडान प्रभावित भएको कोलम्बियाका नागरिक उड्डयन निर्देशक जायर ओर्लान्डोले बताएका छन् ।

समाचार संस्था एएफपीका अनुसार विमानको आकस्मिक अवतरणका क्रममा भने कुनै पनि मानवीय क्षति भएको छैन ।

‘अहिले विमानस्थल सामान्य अवस्थामा सञ्चालनमा रहेको छ भने रद्द भएका १३६ उडान र यसबाट प्रभावित २१ हजार २ सय ४५ यात्रुको यात्रा सञ्चालनको क्रममा छ ।’ ओर्लान्डोले भने ।