काठमाडौँ- अष्ट्रेलियाले पानीमुनी चल्ने चालकरहित उपकरण ड्रोन सार्वजनिक गरेको छ । नौसैनिक युद्धमा प्रयोग हुने यस ड्रोनले समुद्रमुनी निगरानी गर्ने बताइएको छ । यसबाहेक समुद्रमुनी राखिएका नौसैनिक धरापलाई निस्तेज तुल्याउन पनि यस ड्रोन प्रयोग हुनेछ ।

एसिया टाइम्सले जनाएअनुसार डाइभ लार्ज डिस्प्लेस्मेन्ट भेइकल भनिने यस ड्रोनबाट अष्ट्रेलियाको नौसैनिक क्षमता बढ्ने अपेक्षा गरिएको छ । हिन्द प्रशान्त क्षेत्रमा चीनको बढ्दो प्रभावलाई काउन्टर गर्न अष्ट्रेलियाले नयाँ ड्रोन सार्वजनिक गरेको विश्लेषण गरिएको छ ।

थप हतियार समेत जडान गरी यस ड्रोनलाई अझ परिष्कृत गर्ने अष्ट्रेलियाको योजना छ । हतियारजडित ड्रोनलाई ‘गोस्ट सार्क’ नाम दिइएको छ । गोस्ट सार्क सन् २०२५ भित्र अष्ट्रेलियाको नौसेनामा तैनाथ भइसक्ने अपेक्षा गरिएको छ ।

एसिया टाइम्सका अनुसार अष्ट्रेलियाको एन्डुरिल नामक संस्था, शाही अष्ट्रेलियन नौसेना र रक्षाविज्ञान एवम् प्रविधि समूहको सहकार्यमा ड्रोनको विकास गरिएको हो । यसको लागत १० करोड अमेरिकी डलरभन्दा कम रहेको जनाइएको छ ।