काठमाडौँ- संयुक्त राष्ट्रसङ्घका महासचिव एन्टोनियो गुटरेसले मध्यपूर्वी मुलुक इराकमा नयाँ सरकार गठन भएकोमा त्यसको स्वागत गरेका छन् । हालै इराकको संसदले मोहम्मद शिया अल सुडानीको नेतृत्वमा नयाँ सरकारलाई अनुमोदन गरेको थियो ।

एक्काइस सदस्यीय नयाँ मन्त्रिपरिषदमा तीन जना महिला समेत परेका छन् । महासचिवले इराकी सरकारमा महिलाको प्रतिनिधित्वको पनि स्वागत गरेको उनका प्रवक्ताले जनाएका छन् ।

महासचिव गुटरेसले नयाँ सरकारलाई सुधार, जवाफदेही र समुज्ज्वल भविष्यका लामो समयदेखि इराकी जनताले गरेका अपेक्षा पूरा गर्न आग्रह गरेको उनका प्रवक्ता स्टेफेन डुजारिकले बताएका छन् ।

महासचिवले नववठित सरकार र इराकी जनतालाई सहयोग गर्न राष्ट्रसङ्घ पूर्ण प्रतिबद्ध रहेको समेत बताएका छन् ।