काठमाडौँ– हनी ट्रयापिङमा संलग्न रहेको आरोपमा प्रहरीले दुई जनालाई पक्राउ गरेको छ।

महानगरीय अपराध महाशाखाको टोलीले सोलुखुम्बु  नेचासल्यान गाउँपालिका वडा न. ३ घर भई हाल भक्तपुरको बालकोट बस्ने २४ वर्षीय शेखर बास्तोला र २० वर्षीया रेजिना राउतलाई पक्राउ गरेको हो।

उनीहरूलाई प्रहरीले बिहीबार पक्राउ गरेको हो। काठमाडौँ उपत्यकास्थित विभिन्न स्थानमा आपराधिक लाभ लिने उद्देश्यले सामाजिक सञ्जाल फेसबुकमार्फत महिला परिचालन गरेर फोनको आदानप्रदान गरी सम्पर्क समन्वय गराएर झुटा मुद्दा लगाई फसाई दिने भन्दै डर धम्की देखाई रकम असुल गरेको भन्ने उजुरीका आधारमा प्रहरीले उनीहरूलाई काठमाडौँको नयाँ बानेश्वरबाट पक्राउ गरेको हो ।  सामाजिक सञ्जालको माध्यमबाट केटीको प्रयोग गरी पुरुषसँग कुराकानी गरेको अश्लिल कुराकानी गरी उक्त कुराको भिडियो सार्वजनिक गरेर फसाई दिने धम्की दिँदै रकम असुल गरेको प्रहरीको प्रारम्भिक अनुसन्धानबाट खुलेको छ।

उनीहरूलाई थप अनुसन्धानका लागी जिल्ला प्रहरी परिसर काठमाडौँ पठाइएको प्रहरीले जनाएको छ ।