काठमाडौँ- नेपाली सुगम गीत संगीतकी चर्चित गायिका अन्जु पन्त अष्ट्रेलियाको विभिन्न सहरहरूमा गुन्जने भएकी छिन् । ‘विजडम नाइट’ नामक यो सांगीतिक यात्रामा सिड्नीमा नै रहेका गायक सञ्जिव पराजुलीले अन्जुलाई साथ दिने भएका छन् ।

दसैँको अवसर पारेर विजडम इन्टरटेनमेन्टले आयोजना गर्न लागेको ‘विजडम नाइट’ सेप्टेम्बर १७ देखि सेप्टेम्बर ३० सम्म आयोजना हुने जानकारी विजडम एजुकेसन कन्सल्टेन्सीका सीईओ सफल कार्कीले गराएका छन् । ‘अष्ट्रेलियाको विभिन्न सहरहरूमा रहनु हुने गीत संगीत अनुरागीहरूको चाह र माग अनुरूप नै हामीले अन्जु पन्तको साथमा सञ्जिव पराजुलीलाई लिएर सांगीतिक कार्यक्रमको आयोजना गर्न लागेका हौँ ‘ कार्कीले जानकारी दिए ।

उनका अनुसार कार्यक्रम पहिले १७ सेप्टेम्बरका दिन सिड्नीमा हुने छ त्यसपछि भने अन्य सहरहरूमा क्रमशः यो सांगीतिक कार्यक्रमको यात्रा अघि बढ्ने छ । अष्ट्रेलियामा रहनु हुने नेपालीहरू माझ प्रस्तुत हुने अवसर मिलेकोमा गायिका पन्तले पनि खुसी व्यक्त गरेकी छिन् । ‘दसैँको अवसरमा अष्ट्रेलियामा रहनु हुने नेपालीहरू माझ गीत संगीत मार्फत मनोरन्जन प्रदान गर्न म आउँदै छु । हजुरहरू पनि आउनु होला । सँगै नाचौँला, गाउँला र रमाइलो गरौँला’ पन्तले आग्रह गरेकी छिन् ।