काठमाडौं– रुसले युक्रेनको राजधानी किभ र उत्तरी शहर चेर्निभमा आक्रमणको स्तरमा ‘व्यापक कमी ल्याउने’ भएको छ । रुसी उप रक्षामन्त्री अलेक्जाण्डर फेमिनले किभको बाहिरी भाग र चेर्निभमा आक्रमण घटाउने बताएको रुसी समाचार संस्था तासले जनाएको छ ।

रुसी र युक्रेनी वार्ताकारबीच टर्कीको मध्यस्थतामा इस्तानबुलमा भएको प्रत्यक्ष शान्ति वार्ता पछि उप रक्षामन्त्रीको यस्तो भनाइ आएको हो ।

एक महिना भन्दा लामो समयदेखि युक्रेनमाथि आक्रमण गर्दै आएको रुसी फौजको गति सुस्ताएका बेला रुसी पक्षबाट आएको यस्तो भनाइलाई निकै महत्वका साथ हेरिएको छ ।

यद्यपि रुसले पहिले पनि यस्तै बाचा गर्ने गरेको तर व्यवहारमा कार्यान्वयन नगरेको भन्दै आलोचना समेत हुने गरेको छ ।

यसअघि युक्रेनी राष्ट्रपति भोलोदिमिर जेलेन्स्कीले किभको उत्तरपश्चिमी क्षेत्रमा रहेको इरपिन शहरबाट रुसी फौजलाई लखेटेको जनाएका थिए । यद्यपि इरपिनबाट रुसी फौज लखेटिएपनि त्यहाँ लडाइ जारी रहेको उनको भनाइ थियो ।