काठमाडौं– अमेरिकाले जर्मनीस्थित नेटो सैन्य आधारमा थप ६ लडाकु विमान तैनाथ गर्ने भएको छ । अमेरिकी रक्षाप्रशासन पेन्टागनका प्रवक्ता जोन किरबीले नेटोको रक्षा सतर्कता बढाउन जर्मनीको स्पाङडाहलेम हवाई अखडामा थप ६ नेभी ईए–१८ जी लडाकु विमान परिचालन गर्न लागेको बताएका हुन् ।

यसले ‘सतर्कता बढाउन र नेटोको सामूहिक रक्षा तयारी र हाम्रा साझेदार मुलुकहरुबीच हवाई एकात्मकतालाई थप मजबुत बनाउनका लागि’ सहयोग पुग्ने उनको भनाइ छ ।

किरबीलाई उद्धृत गर्दै जर्मनीको डीडब्लू टेलिभिजनको अनलाइन संस्करणले जनाएअनुसार लडाकु विमानका साथै पाइलट र मर्मत सम्भार गर्नका लागि थप २४० सैनिक पनि परिचालन गरिनेछ ।

यद्यपि यो तैनाथी युक्रेनमा रुसी फौजविरुद्ध लक्षित नभएको र नेटोको पूर्वी मोर्चालाई सशक्त बनाउनका लागि मात्रै यो निर्णय लिइएको उनले स्पष्ट पारेका छन् ।

बोइङ कम्पनीद्वारा निर्मित यो लडाकु विमानलाई विद्युतीय उपकरणलाई निष्कृय बनाउन एवम् जमिन र समुद्रमा सुरक्षा प्रदान गर्न प्रयोग गरिदै आइएको डीडब्लूले जनाएको छ ।