काठमाडौं– वार्ताका क्रममा इङ्ल्याण्डको चेल्सी क्लबका मालिक एवम् रुसी धनाढ्य रोमन अब्रामोभिच संदिग्ध विष आक्रमणको शिकार भएको खुलासा भएको छ । उनको निकटस्थ स्रोतलाई उद्धृत गर्दै बीबीसीले जनाएअनुसार यही महिनाको शुरुमा बेलारुसको सीमामा शान्ति वार्ताका क्रममा उनले विष आक्रमणको लक्षण देखाएका थिए ।

बीबीसीले जनाएअनुसार उनको आँखा रातो भएको थियो भने उनको छाला पनि फुटेको थियो । यही वार्ताका क्रममा युक्रेनका दुई प्रतिनिधिले पनि यस्तै किसिमको लक्षण महसुस गरेको बीबीसीले जनाएको छ । यहीबेला उनीहरु पीडादायी रुपमा रोइरहेको समेत अन्तर्राष्ट्रिय सञ्चारमाध्यमले जनाएका छन् ।

यता अमेरिकाबाट प्रकाशित हुने वालस्ट्रिट जर्नलले भने विष खुवाउने यो षड्यन्त्र शान्तिवार्ता विफल बनाउन चाहने रुसका कट्टरपन्थीले रचेको जनाएको छ । यद्यपि अमेरिकी गुप्तचर अधिकारीले समाचार संस्था रोयटर्सलाई बताएअनुसार उनको लक्षण विष सेवनबाट भन्दा पनि वातावरणीय कारणले देखिएको हो ।

रुसमाथि विष खुवाएर राष्ट्रपति भ्लादिमिर पुटिनका आलोचक र विरोधीहरुको हत्या गर्ने गरेको आरोप लाग्ने गरेको छ । सन् २०२० मा रुसी विपक्षी नेता अलेक्सेई नभाल्नीमाथि पनि विष खुवाएर मार्ने षडयन्त्र भएको थियो ।

त्यस्तै सन् २०१८ मा पुटिनका आलोचक सर्गेई स्क्रिपाल र उनकी छोरीलाई पनि बेलायतमा विष खुवाइएको थियो । त्यसअघि सन् २००६ मा बेलायतमा बस्ने अलेक्जाण्डर लित्भिनेन्कोको पनि विष खुवाएर हत्या गरिएको थियो ।