काठमाडौँ- आउँदो तिहारमा दयाहाङ राईको दुई फिल्म एकसाथ् प्रदर्शनमा आउने सम्भावना बढेको छ । अर्थात् तिहारमा नेपाली दर्शक माँझ दया भर्सेस दया हुने सम्भावना उच्च छ ।

निर्देशक दीपेन्द्र के खनालले आफू निर्देशित फिल्म ‘के घर के डेरा’लाई तिहारमा रिलिज गर्ने तयारी गरेसँगै सम्भावना उच्च भएको हो । डिएस डिजिटलले डेब्यू निर्देशक सुरज पाण्डेको निर्देशनमा बनेको फिल्म ‘परस्त्री’ हुने घोषणा गरेता पनि यसलाई पछाडि सार्दै ‘के घर के डेरा’ ल्याउने तयारी गरेको हो ।

यहीँ मितिमा दीपेन्द्र लामा निर्देशित फिल्म ‘दुई नम्बरी’ पनि प्रदर्शन तय गरेर पोष्ट प्रोडक्सनको काममा छ । दुवै फिल्ममा दया छन् । पछिल्लो फिल्म ‘कबड्डी’ मार्फत चर्चामा रहेका दयाको एकसाथ फिल्म प्रदर्शनमा आउनु दर्शकका लागि भने राम्रो होइन । त्यसो त दुई दीपेन्द्रको भिडन्त यो पहिलो भने होइन । यस अगाडी पनि लभ लभ लभ र घामपानी नयाँ वर्षको डेटमा भिडेका थिए ।

फेस्टिभलको समय र स्टारकास्ट हेरेर दुई नम्बरीको डेटमा के घर के डेरा ल्याउन लगिएको चर्चा छ । ‘दुई नम्बरी’ मा दयासँगै सौगात मल्ल, उपासना सिंह ठकुरी लगायतका कलाकार छन् । यस्तै , ‘के घर के डेरा’ मा दयासँगै विपिन कार्की , वर्षा राउत , सुरक्षा पन्त लगायतको अभिनय रहेको छ । यी दुई फिल्मसँगै तिहारमै ‘नालापानी’ पनि प्रदर्शनमा आउने घोषणा गरिसकेको छ ।