काठमाडौं- आक्रमणकारी रुसी फौजले युक्रेनका स्वास्थ्य केन्द्रहरुमा ७२ पटक आक्रमण गरेको विश्व स्वास्थ्य संगठन डब्लूएचओले जनाएको छ । गत फेब्रुअरी २४ यता युक्रेनमाथि आक्रमण गर्दै आएको रुसले युक्रेनमा स्वास्थ्य केन्द्रहरुलाई ७२ पटक निशाना बनाएको डब्लूएचओले प्रतिवेदन सार्वजनिक गर्दै जानकारी दिएको हो ।

स्वास्थ्य केन्द्रमा रुसी आक्रमणका क्रममा ७१ जनाको मृत्यु पनि भएको डब्लुएचओको प्रतिवेदनमा उल्लेख गरिएको छ । डब्लुएचओले प्रतिवेदन सार्वजनिक गरेपछि राष्ट्रसंघका महासचिव एन्टोनियो गुटेर्रेसले युक्रेनमा जारी मानवीय संकटबारे गहिरो चिन्ता व्यक्त गरेको अन्तर्राष्ट्रिय सञ्चारमाध्यमले जनाएका छन् ।

‘मानिसको स्वास्थ्य अधिकारको रक्षा हुनु पर्दछ, स्वास्थ्य संस्था माथि जस्तो सुकै युद्धका बेलामा पनि आक्रमण गर्न पाइदैन ।’ गुटेर्रेसलाई उद्धृत गर्दै भारतको समाचार संस्था एएनआईले जनाएको छ ।

स्वास्थ्य संस्थाहरू माथि आक्रमण गर्नु आधारभूत मानवअधिकार विरुद्धको अपराध र युद्ध अपराध सरह हुने अधिकारवादीहरूले जनाएका छन् । युक्रेनमाथि आक्रमण गरेको विषयलाई लिएर रुसको चर्को आलोचना हुँदै आएको छ ।